13 มีนาคม 2562

ลำกลอน (ทางสั้น) หมอลำเปลี่ยนตามสมัย


ลำกลอน (ทางสั้น) หมอลำเปลี่ยนตามสมัย 
(ผู้ประพันธ์ บุญจันทร์ เพชรเมืองเลย 23 ก.ค. 54)

(ขึ้นลำ) โอย….โอ่ยละหนอ
ละจิตเอย จิตวิญญาณอีสานนี้ หนีบ่พ้น ฮีตคองเก่า แต่อดีตโบราณเฮา สืบฮอดมาสุมื้อนี้
เฮาเต็มที่ ฮักหวงแหน โอ้ยเด้หนอ
(เนื้อในกลอนลำ) (บทที่ 1)
ฟังเด้อเจ้า คุณท่านทั้งหลาย
กาลสมัยเวลา ผันเปลี่ยนเวียนแล้ว
มีหลายแนวลืมเมี้ยน สูญสิ้นหลายอย่าง
บ่มีทางคืนได้ เสียถิ่มเปล่าศูนย์
(บทที่ 2)
โบราณพุ้น เฮาจ่ายผญา
กลอนเกี้ยวพาราสี หยอดกันม่วนแท้
ลำแก้โจทย์กะได้ ควมทวยกะม่วน
พากันชวนนั่งเว้า กินข้าวฮ่วมพา
(บทที่ 3)
ยังบ่ช้า หากเลาความหลัง
มันเป็นวังเวียนวน หมุนไปคือน้ำ
หมอลำแต่เก่าพุ้น มีกันหลายอย่าง
บ่มีทางตายได้ จนเท่าสู่วัน
(บทที่ 4)
แต่ก่อนนั้น เอิ้นว่าลำปัว
ปัวคนมารักษา หรือลำผีฟ้า
ผีปู่ตาเฮ็ดให้ฮ้อน ผิดคองฮีตเพิ่น
จั่งเผชิญป่วยไข้ ลำแก้ฮักษา

(บทที่ 5)
ลำผีฟ้า ปรับเปลี่ยนเวียนหัน
เลยพลิกผันบทกลอน เข้าสู่ลำพื้น
หนังสือผูกอ่านเทศน์ นิทานธรรมต่าง ๆ
ลำขูลูนางฮั้ว หัวไห้ใส่กัน
(บทที่ 6)
ลำบ่สั้น ดึกดื่นมันยาว
คนเดียวลำบ่ไหว หาผู้ลำแก้
แลเห็นผู้สาวเว้า ลำนำได้บ่
นางขอลำข้างอ้าย พอเว้าม่วนกัน
(บทที่ 7)
มาซั้นตั๊วะ ฮีบฟ้าวมาลำ
บ่คลำแนวใด๋ โอยหนอโอโอ้
ลายโป้งซ้ายแคนขึ้น เสียลำฟังม่วน
ลำซ้วนกันเกี้ยวฟ้อน เขาเอิ้นว่าลำกลอน
(บทที่
ผู้อยากฟ้อน อ้อนอ่อยถามหา
สิพาลุกยามใด๋ ยุคใหม่ลำเรื่อง
มีเสียงลำตามเว้า เทิ่งเวทีใหญ่
ผู้แสดงเต็มฮ้าน เอิ้นลำเรื่องต่อกลอน
(บทที่ 9)
มันออกฮ้อน ฮุ่ม ๆ อยู่คิง
ยุคสตริงสมัย มาแกมแซมแล้ว
บ่มีแนวใด๋อ้าง เฮ็ดโตคือเก่า
มีแต่เหงากับเศร้า คนถิ่มมิดเสีย
(บทที่ 10)
กินขี้เพี้ย ยังว่ามันขม
เอาผสมหลายแนว ยังนัวแซบได้
เกิดสมัยลำซิ่ง ดนตรีพร้อมพร่ำ
หมอลำเฮาตื่นได้ คนฮู้ทัวแดน
(บทที่ 11)
ทุกแว้นแคว้น ทั่วถิ่นอีสาน
ขาดสียงลำเสียงแคน ใจฝ่อเหี่ยวได้
ไผ๋ได้ยินกะหลงฟ้อน ออนซอนตาหน่าย
ย้อนขาขวาขาซ้าย ซื่นได้ม่วนแฮง
(บทที่ 12)
มาปะแป้ง คือเก่าสงกานต์
มาเฮ็ดทานวันศิล อย่าลืมไลเว้น
ยามมื้อเว้นนั่งเว้า ลำนิทานคือเก่า
ให้ผู้เฒ่าสอนไว้ จื่อแล้วศึกษา
(บทที่ 13)
คั่นยังช้า ชิบ่ทันเห็น
ชาติพันธุ์ของตน สิบ่มีฮู้
มาอดสูนั่งไห้ ถืกเขาลักไปต่อ
เขาขอไปเบิ๊ดแล้ว แนวอ้างบ่มี
(บทที่ 14)
แต่มื้อนี้ เฮาควรหวนคิด
สิ่งใด๋ผิดเฮ็ดพลาดพลั้ง ควรแก้อย่าลืม
อยากตื่มเว้าหลายโพด ผู้ฟังให้จำแหน่
เอาหมอลำเฮาไปแพร่ ขยายไปให้กว้าง ๆ
คนได้ฮู้สืบต่อไป…….

ไม่มีความคิดเห็น:

แสดงความคิดเห็น

บทความที่ได้รับความนิยม

ข่าวเรียกบรรจุครูทั่วไทย อ่านต่อได้ที่: http://www.kruwandee.com/widget.html

ศิลปวัฒนธรรมลุ่มน้ำโขง: วรรณกรรมท้องถิ่นอีสาน

ศิลปวัฒนธรรมลุ่มน้ำโขง: วรรณกรรมท้องถิ่นอีสาน
ศิลปวัฒนธรรมลุ่มน้ำโขง: วรรณกรรมท้องถิ่นอีสาน